那天坐巴士，後面來了兩位青年。
看來，青年剛打完波，穿著運動服，拿著大大的手提袋。
甲：「蝦~~究竟選什麼科目才最賺錢？business...finance...」
乙：「唏，讀多個law...blablablah...以前做工程師就最煞食，現在就真係慘了...」
講了一陣...
甲：「有人真係勁炒股，一賺就幾個double...有朋友買港交所，現在賺到笑...」
乙：「我媽有朋友，炒股賺的可以過世...真係睇你好唔好彩...」
甲：「我個friend住干德道，二千幾呎，父母同佢仲有工人，都話唔夠住，想搬，你知搬幾大間屋？五千呎。」
乙：「真係睇下你條命生成點。」
講了一陣...
乙：「有時勤力都冇用，睇下你條命生成點。」
甲：「咁勤力都好過唔勤力，否則連麥記都冇得你做。」
乙：「真係睇條命生成點...」
兩位有為青年下車。
我夠知條命生得好就更好。
但出生含著金匙又如何？世界變幻無常，有人出生有錢家庭，不是都面對家道中落、破產的事實？
條命生成點，你會知嗎？今天即使不濟，便代表日後要踎街嗎？
年青人，很悲哀你們每句說話的重點都在金錢上。
那麼，你們的理想是什麼？
你們選的科目，是有興趣在內嗎？
好失望，還未步入這現實世界，還未出來社會磨練過，已失去了夢想，眼中只有$。今時不同往日了。
恕我天真，沒錢當然萬萬不能，但錢，亦不是萬能。