20070819

眨下眼，亞霍玩中興盃已經有三年，要更正，亞霍由大埔跑過荃灣城門水塘影中興盃係第三年．雖然亞霍無報名參賽中興盃，不過亞霍一次比一次，越走越開心．

第一年(2005)，暴雨後潘哥同亞霍上城門，大舊哥同華哥參賽．由於暴雨，當日出席人數少一截．而亞霍當時新用數碼相機，結果影完啲相全部報銷，相底就留在亞霍的腦海回憶中．第二年(2006)，天氣就悶熱異常，小伙子隊就由大舊哥做代表，潘哥、華英雄同亞霍就鬆過去．當天好多好手也中伏；Ｂ砵車不絕，新聞大賣．上年小伙子隊影到約400張相上網．

今年，同大埔一眾好友迎戰中興盃，加埋在網上認識不少跑友，成棚人，替識嘅同唔識嘅跑手影相，高興開心指數就更加爆哂燈啦！（咁多相就知啦．）

話說回來，今早大埔跑友就兵分三路．跑中興盃的就自己安排上比賽場地，跑嘅有鶴爺、能哥、偉哥同華英雄；神經刀同太子爺不住大埔，就自由發揮．唔跑嘅，又唔去城門捧場，就被鶴爺發配留守吐露港邊疆，依舊六點鐘大王爺集隊；呢，神跑俠侶、潘哥、大導、菜軟同魯板就被罰沿港走廿零K啦！呀，大導除外．仲有呢？大舊哥、ray同亞霍走精面，比賽呀，唔好嘞；廿零K，多謝嘞；就係咁，被安排出少差，由山塘道上鉛礦凹就落城門，做戰地攝記！三個都要做攝記呀！

車，將在外嘛，唔好理鶴爺啦！你以為啦，鶴爺一早嚟大王爺點名嘞．

今年，天公做美．昨晚雷電交加，把香港空氣洗滌得一塵不染．今早除濕度稍高一點外，氣温就真的怡人──至低限度，大舊哥、ray同亞霍由大埔走過去城門水塘嗰段的時刻是如此，真是好享受呀．沿途大舊哥仲一展歌喉，ray哥就做和音，亞霍就好似帶住兩個會行嘅 karaok，一路聽住身歷聲，加埋啲小鳥吱吱，一路跑步，一邊吸住清新嘅大自然空氣，聞住花草之香，真係夫復可求．咁辛苦比賽就留番俾各跑友啦！大舊哥、ray同亞霍就為大家影下相．

大王爺班友仔唔知點呢？阿跑，噚日神醫水療法，亞霍專登迫佢游咗三十幾個直池，今日有無扯散佢？大導，你無牌喎，唔好亂嚟，鬆下好嘞；小心菜軟馬尾呀．Ｊ神，走20K算嘞，鶴爺無千里眼咖．魯板，停課好幾個星期，今日一於陪 “跑” 啦．

呢，鶴爺唔俾啲壓力，太子爺竟然瞓到 7:45 至起身．趕到嚟，啱啱 8:15 起步時間──不過，哈哈，唔好意思，大會提早 5 分鐘起步噃，呢啲就係經驗嘞．太子爺惟有大讓賽，後來追番幾多人呀！藥物偉哥，今朝一早就食興奮劑，起步同鶴爺一齊，三兩個戰步，甩咗鶴爺仲眼花花，以為鶴爺响前面；去到1K位，嘩，做 3:08！有無搞錯，收油；終於跑到返嚟話好熱喎！下次唔好食藥嘞．神經刀都傻嘅（明知啦），竟然都偷食亞偉啲藥，雖然走唔到 3:08，不過都四分頭，結果K零就藥力發作──發軟蹄！想棄權咁滯．門主，你食藥都唔好食隻過年期嘅（你今年貴庚呀）至得咖．能哥就按本子，穩守突擊，返到嚟話夠運喎．能哥，你謙啦，跑步最公平，講實力，邊有冷爆咖．唔通亞霍求神拜佛就可以贏鶴爺同佳哥咩．鶴爺點？咪入三甲囉．

哎唷！弊！弊乜？唔係啲相無哂嘛？當然唔係啦，三部輕機，一部失手有第二部嘛．不過，今日亞霍彈 ray 哥幾次，話佢經驗不足；ray 哥就嚟個大報復，話亞霍你咁有經驗，嗱，而家影咗成2000幾張相，你返屋企慢慢分類同 upload上網喇！救命呀！

救命呀！ray哥，亞霍見你影啲相，都要講下你經驗不足，成日影亞霍後尾枕；放出嚟，點見得人？惟有將唔見到人嘅相清咗先．ray哥得閒就跟小伙子隊周圍去做攝記啦．

各位跑友，多得 ray 哥，總數約二千四百多張相片，請慢慢歎呀！

鶴爺監軍, 無得蛇.

由山塘道出城門, 行行跑跑, 聽下流動 karaok, 幾好享受呀.

華英雄有好友專登嚟打氣.

幾個相識廿幾年老友

要同方太影張

起步

小伙子隊有競爭對手添-----大家都幫跑友影相

今次補番數,幫太子爺影張衝線相. 呢張係堅咖.

有交待啦.

飲完茶, 雙騎交魚.